قصايد قصيرة

* 1 *
يا بحر متعافي
ملحك طفح ع النني
عراني
سقطت ملامحي ف خضتي
غرقت ف بير
خطاف عيوني اتمد
ع الجثة اللي جنب الملامح
خط اتصال فردي
بينز م الجمجمة
يوصل مابين المدي
وبين الدهشة م الداخل
** ** **
الشط متاكل صحيح
واللا الرمال …
بتنخ للميه ..!!

* 2 *
فوق جبيني اللي قاعد
تحت باطي الشمال
افتح مسام الجلد
واتمدد
مابين زرقة عيون البنت
والدم الخفيف

* 3 *
ريحة لمون الفجر
تدخلني بلا أستئذان
وحبيبتي قاعدة ف بصتي
تفرش شعورها البرتقاني
فوق السلالم غنا
أعشق مني
ريحة خروج الصبح
م المرئ

* 4 *
صحيني خدني معاك
لصلاة الفجر
وحاسب ..!
يمكن أتاخد منك
علي باب الجامع
زي مااخدوا
( الشوز )
من مدة
بتاع …
أشـرف

* 5 *
فتش ف جيوبه
عن قرص الريفو
سقطت كف ايديه
للروح
في شراب مقطوع

* 6 *
شحات ..
وايديه محرومة
..  ..
..
ياااااه

* 7 *
قلبي مليان نعناع
وخيول مطلوقه بترمح
بين شرياني التاجي
وبينك
بسملت
الورد اتوزع بين تقاطيعي
آيات
صدقت

* 8 *
البرتقان
ودع طراوة حجرك
الهزاز
وشي اللي فيك طاطا
دمي ببساطة هرب
من شهقة النعناع
لآخر حدود الجفن

* 9 *
حسيت بدوار
فخرجت برأسي لجسمي البراني
لقيت الموجة بتسحب
من تحت ضوافري
الروح

* 10 *
عيل كان بيمر الشارع
داسه
خشت في مداسه الزحمة تفتش
لقيت أنفاسه بتلعن
الوان الطيف

* 11 *
متضايق جدا لونك
ضامم صبحينه ..
سـواد

* 12 *
بنوته خارجة
تشتهي بوح الولد
وتفك ريق الصبح
بشويش تحايله
ترسمه
ضحكة مركونة ف زمان
علي شق حيط …
بيتنا القديم

* 13 *
بيشد برد الجفا
علي قدها ..
وينام
ينزل شيطان الحلم
يسكن صدرها
تدخل شهيقي ..
تنتحب

* 14 *
2 مايو
الساعة 11
بعدل صورة
مقلوبة تملي
علي ضهر الحيط
ادخلها
تدخلني
الساعة 12
اطلع ..
اقلبها أفوت

* 15 *
مش عارف ليه
ف الشارع ده بالذات
لما بهدي
شيطاني بيكبر

* 16 *
ريحة الملايكة
بتدخلك سرقة
لحظة سجودك
بين السما
والموت

* 17 *
شبك الصياد محتار
بين رعشة سمك البحر
وبين ..
.. .. ..
.. ..
..

* 18 *
شدت مني
وش الصيادين م الشبك …
ضحكت